Isang batang estudyante ang nabundol ng isang kotse habang tumatawid sa pedestrian lane sa Legaspi City. Albay. Ang suspek, nagtangka pang tumakas.
Sa ulat ng GMA News TV "Quick Response Team" nitong Biyernes, ipinakita ang kuha ng CCTV sa lugar nang tumawid ang biktima at mahagip ng pulang kotse.
Makikita rin na una nang tumigil ang isang pampasaherong jeepney sa tapat ng pedestrian lane para pagbigyan ang biktima at isa pang batang tatawid.
Pero ang pulang kotse, nagtuloy-tuloy sa pagtakbo at nahagip ang bata. Sa lakas ng pagkakabundol, sumirko pa sa ere ang biktima.
Hindi pa tumigil ang kotse pero nahuli siya nang habulin ng mga motorcycle rider.
Dinala sa ospital ang biktima at maayos na ang lagay nito. Mahaharap naman sa kaukulang reklamo ang driver ng kotse.--FRJ, GMA News
