Naging usap-usapan na tila deleted na ang Instagram account ni Tom Rodriguez sa gitna ng issue ng hiwalayan nila ng misis na si Carla Abellana.
Iniulat ng Unang Balita nitong Huwebes na makikita ang "Sorry, this page isn't available" sa verified IG account ni Tom at hindi na rin ito ma-access ng fans.
Gayunman, hindi pa malinaw kung nag-deactivate si Tom ng account.
Sinubukang hingan ng panig ang talent management ni Tom pero hindi pa sila nagbibigay ng sagot tungkol dito.
Tatlong buwan matapos ang kanilang kasal, usap-usapan na "on the rocks" ang relasyon nina Tom at Carla dahil sa kanilang cryptic posts at pag-unfollow sa account ng isa't isa.
Naging maugong pa ang usapin nang pumayag makipanayam ang ama ni Carla na si Rey "PJ" Abellana at inilahad na may problema ang mag-asawa.—Jamil Santos/AOL, GMA News
