Inihayag ni Mikee Quintos na hiwalay na sila ni Paul Salas matapos ang mahigit tatlong taon na relasyon.
"Napakahirap itanong ito. Oo o hindi, kayo ba ni Paul Salas ay nagkahiwalay na?" diretsahang tanong ni Tito Boy kay Mikee sa "Fast Talk with Boy Abunda" nitong Martes.
Napabuntong hininga muna si Mikee bago ibinigay ang kaniyang sagot.
"Opo, hiwalay na," tugon niya.
Paglilinaw naman ni Mikee, walang third party sa kanilang hiwalayan. Gayunman, pinili niyang si Paul na lamang ang magsalita tungkol sa dahilan ng kanilang hiwalayan.
"Wala pong third party. 'Yung 'Bakit?' I think it's better if you hear from him. That's better. Pero honestly, before today, pinag-iisipan kong mabuti kung magsasabi na ako sa public o hindi, mahirap ito for me. It is a big jump," lahad niya.
"'Yung feelings ko, kinokontra 'yung iniintindi ko sa brain ko, lahat. Hindi naman sa ayaw kong i-share. Pero I think there's a right time for it. Pagdaanan ko na lang po muna, and then eventually 'pag okay na ako," pagpapatuloy ni Mikee.
Inamin ni Mikee na hindi niya inasahan ang mga pangyayari.
"Shocking for me lahat ngayon. Shocking. A month ago na 'yung nag-start kaming mag-usap about this decision. And ngayon, nagiging clear sa amin na ito nga 'yung tama for us. Mutual naman na decision 'to," saad ng "Slay" actress.
Sinabi pa ni Mikee na, "bata pa kami."
"Sincere 'to from the bottom of my heart. Pinanghahawakan ko lang ngayon 'yung faith ko Tito Boy na, sa lahat ng pinagkuwentuhan ko, these girls sa 'Slave,' they have been really supportive. Laking bagay na nagwo-work tayo," ayon pa sa kaniya.
Ipinauubaya na ni Mikee sa Diyos ang kaniyang hinaharap.
"Pero sa lahat ng nahingian ko ng advice Tito, ang na-realize ko sa dulo, 50-50 eh. Nakakagulo lang din ng isip kung lahat tatanungin ko, same lang din eh. 'Yung will lang din ni Lord 'yung matutuloy sa ending so I'll just have faith on that na kung kami, kami," ayon sa host ng cooking talk show na "Lutong Bahay."
"Kung kami, I know Siya na ang maghahanap ng way na mangyari 'yun, si Lord. So I won't try to control things. I just know na ito 'yung tamang desisyon now," sabi pa ni Mikee.
Iginiit ni Mikee na pinaglaban niya ang relasyon nila ni Paul, at wala siyang pinagsisisihan.
Mga natutunan
Matapos ang kanilang breakup, inilahad ni Mikee ang kaniyang natutunan tungkol sa pag-ibig.
"I think what I learned about love is one, we attract love that we give ourselves. Kung gaano natin kamahal ang mga sarili natin, 'yun ang love na tinatanggap natin, or ganu'n 'yung mga lalaki or partners na naa-attract natin. 'Yun lang din 'yung kayang tanggapin ng heart natin," saad niya.
"And two, you just can't choose. Si Lord talaga eh. Puwede ka sigurong mag-request sa Kaniya pero, you can't control everything," sabi pa niya.
Sa kabila nito, nagpasalamat si Mikee na hindi siya nakaramdam ng pananamantala sa pagmamahal na ibinigay sa kaniya ni Paul.
"Hindi naman sa hindi nasusuklian Tito. Ano rin ako, give, give, give ako. Nakakalimutan ko ang sarili ko. Lucky pa nga ako na, feeling ko puwede pang mas na-take advantage ni Paul 'yon, pero hindi naman. Pero masakit pa rin," aniya.
Pinanghahawakan ni Mikee ang kaniyang pananampalataya na malalampasan niya ang sakit na nararamdaman niya ngayon.
"Ang laking bagay ng work. Pero pinakapinanghahawakan ko 'yung faith ko talaga, Tito. I have trust na everything really does happen for a reason," sabi pa niya.
Kinumpirma ni Paul noong 2022 na dating sila ni Mikee. Ipinagdiwang nila ang ikatlo nilang anibersaryo noong Hulyo. -- FRJ, GMA Integrated News
