Mula sa mga kababalaghan, sumabak muna sa pagluluto ang paranormal researcher na si Ed Caluag sa bagong programang "Lutong Bahay" na host si Mikee Quintos.
Para sa Halloween episode, game na sinagot ni Ed ang mga tanong ni Mikee tungkol sa kaniyang paranormal powers, mga gamit, at paboritong pagkain.
Ipinakilala rin ni Ed ang kaniyang girlfriend na si Mira Belle.
"Paano po ba maglambing ang isang Ed Caluag," tanong ni Mikee kay Mira.
Pabirong sumagot si Ed na, "Nagpapatimpla ako ng kape," na inayunan naman ni Mira.
Ayon kay Mira, anim na taon na ang relasyon nila ni Ed, na tinawag niyang "sobrang saya," ng kanilang pagsasama.
Sinabi ni Ed na si Mira ang babae na kaniyang napapanaginipan mula pa ng kaniyang pagkabata.
"Nung bata pa ko, high school, college, meron akong recurring dream, paulit-ulit lang. Blurred yung mukhang pero kita mo yung buhok, yung body build. Siya yon," ayon kay Ed.
Ibinahagi rin ni Ed ang paborito niyang lutuin na Ginataang Ayungin, na paborito rin ng kaniyang ama.
Alamin kung papaano ito lutuin sa video ng "Lutong Bahay," na mapapanood sa GTV, mula Lunes hanggang Biyernes, sa ganap na 5:45pm. — FRJ, GMA Integrated News
