Sinorpresa ni Alden Richards ng bouquet at regalo si Kathryn Bernardo sa ginanap na birthday party ng dalaga nitong Martes ng gabi.

Inorganisa ang surprise birthday party ni Kath ng kaniyang stylists na sina Boop Yap at Kim Yap.

Sa Instagram stories ni Boop, ibinahagi niya ang isang video nang dumating si Alden na dala ang bouquet at isang regalo mula sa French luxury house na Baccarat para kay Kath.

Sa video, mapapanood na nabigla si Kathryn nang makita si Alden sa venue, bago siya tumayo at lumapit sa Kapuso actor.

Nagbahagi rin si Earl Semitara, co-creative director ni Mark Bumgarner, ng hiwalay na video na kumukuha ng mga selfie sina Alden at Kath gamit ang digital camera na makikita ang closeness ng dalawa.

Noong nakaraang buwan, dumalo rin si Alden sa star-studded birthday bash ni Kathryn sa El Nido, at kumanta pa siya ng “Bakit Ngayong Ka Lang" sa karaoke night.

Dumalo rin sa naturang party sina Joshua Garcia, Jericho Rosales, at Dominic Roque.

Nagkatambalan sina Alden at Kathryn sa box office hit movie na “Hello, Love, Goodbye.”-- Jamil Santos/FRJ, GMA Integrated News