Inihayag ni Yasser Marta na anim na buwan na niyang nililigawan si Kate Valdez, at patuloy siya sa pagsuyo sa puso ng dalaga.
Sa nakaraang episode ng “The Boobay and Tekla Show,” sinabi ni Yasser na halos anim na buwan na niyang nililigawan si Kate.
“Six months na, magsi-six months na,” sabi ni Yasser.
Inilahad ni Yasser ang nagustuhan niya kay Kate.
“Sa totoo lang noong una ko pa lang siyang nakita, nagkasama kasi kami sa isang show sa Regal. Doon ko nakita sa kaniya na ‘Ah,’ sabi ko…” anang Kapuso actor.
Gayunman, hindi naituloy ni Yasser ang kaniyang sasabihin, na tila kinikilig.
“Parang na-holdup niya ako eh,” sabi niya.
Biniro naman ni Boobay na tila masuwerte si Kate dahil siya ang nagwagi sa puso ni Yasser.
“Dapat siya ‘yung suwerte,” hirit naman ni Kate.
Mensahe ni Kate kay Yasser: “Thank you for always being there for me, for always supporting me.”
“I’m always here for you,” tugon naman ni Yasser sa dalaga.
Nauna nang sinabi ni Yasser na hindi nila minamadali ni Kate ang kanilang relasyon. —VBL, GMA Integrated News
