Humingi ng paumanhin ang aktor na si Rob Gomez nang sabihin niyang "single" pa siya sa isang panayam gayung may pamilya na siya.
Sa Instagram, nag-post nitong Linggo si Rob ng ilang larawan na kasama ang dating beauty queen na si Shaila Rebortera, at anak nilang si Amelia.
"This is my why, my princess, my queen, my sunshine and my world. My choice every day, in this lifetime and the next," saad niya sa caption.
Nag-iwan din ng mensahe si Rob para sa kaniyang pamilya.
"I'm sorry I said yes to being single when I'm not. I promise to keep my promises to you this time. I love you and Amelia more than anything in the world!" ayon sa aktor.
Sa panayam kamakailan ng "Fast Talk With Boy Abunda," sinabi ni Rob na single siya pero may "someone."
Ayon sa ulat ng PEP.ph, sinabing matapos ang naturang panayam, inihayag ni Shaila na may anak na sila ni Rob.
"I've always been told to wait for the perfect time to tell the world about you. However, I realized, there is no such thing as 'perfect time,'" ani Shaila sa Instagram.
"We only have one life to experience these moments and it is in our hands to make these moments perfect," dagdag ng Miss Multinational Philippines 2021.
Napapanood si Rob sa GMA Afternoon Prime series "Magandang Dilag" kasama sina Herlene Budol at Benjamin Alves. —FRJ, GMA Integrated News
