Nagmistulang reunion ng mga Kapuso stars ang GMA Thanksgiving Gala. Kasabay nito, tila naging homecoming din ito sa mga balik at bagong Kapuso.

Sa ulat ni Nelson Canlas, sinabing naki-party din ang iba pang stars na kaibigan ng GMA mula sa ibang network.

Puno ng excitement si Bea Alonzo na dumalo kasama ang nobyong si Dominic Roque.

"Siyempre bagong Kapuso lang ako, and yet we are celebrating this huge thanksgiving event. And rightfully so kasi we have a lot to be thankful for. After all the challenges we're still here, we are healthy and we are thriving. Sana magkaroon pa tayo ng more events like this," sabi ni Bea.

Nagpasalamat din ang mga bagong Kapuso na sina Xian Lim, Richard Yap, Khalil Ramos at Beauty Gonzalez.

"I feel great being invited to this huge occasion ng Kapuso stars ng GMA Network. I feel blessed and I feel grateful na napabilang ako dahil, nakakatuwa lang na nandito ako kasama ang big stars ng GMA," ani Xian.

"For me it is very special because as someone who's new to GMA, I feel like it's really such an honor to be here right now, especially because it's such a momentous occasion that we're celebrating the 72nd anniversary of GMA," sabi ni Richard.

"Ako personally it's my first time seeing a lot new faces, so sobrang nakakatuwa to see everyone finally here and almost complete," sabi ni Khalil.

"I'm really thankful right now. I'm speechless more than words and I hope tuloy-tuloy pa rin. I feel so loved, I feel so happy to be Kapuso," sabi ni Beauty.

Nagsilbi rin itong homecoming para kay Billy Crawford, na dumalo kasama si Coleen Garcia.

"Definitely yes, dito ako nagsimula eh. I started here, I was here when I was four years old... Hindi na mabubura 'yon, so I was once a Kapuso, and I think I'll always be a Kapuso," sabi ni Billy.

Dumalo rin sa gala ang grupo nina John Lloyd Cruz, Miles Ocampo at Maja Salvador.

Nostalgia naman ang naramdaman ni Cristine Reyes nang muling makita ang dating mga kasamahan sa GMA.

Nandoon din ang mga beteranong artista na sina Alice Dixson, Albert Martinez, at Eula Valdez.

Present din ang National Artist for Film and Broadcast Arts na si Ricky Lee, kasama ang iba pang creator ng Entertainment Group.

Unang beses ding rumampa bilang Kapuso si Zephanie.

Ikinatuwa rin ni Sparkle GMA Artist Center consultant Johnny Manahan na bahagi siya sa pagpapalutang ng kinang ng Kapuso stars.

"Masaya at nakita ko na, face to face, 'yung mga artista. Mas maganda sila sa personal, and I think they're having a nice time," sabi ni Mr. M. -- Jamil Santos/FRJ, GMA News