Pumanaw na sa edad na 63 ang dating aktor na si Edgar Quizon, anak ng namayapa na ring Comedy King na si Dolphy.
Ibinahagi ng actor-director na si Eric Quizon ang malungkot na balita tungkol sa kaniyang kapatid na si Edgar sa pamamagitan ng Instagram post.
“Farewell Kuya Edgar. May you find peace in heaven. Please hug Dad, Kuya Freddie, Kuya Rolly and Dino for me. You will be missed. We love you. Rest in peace my brother,” sabi ni Eric.
Mayroong 18 anak si Dolphy.
Si Edgar ay anak ni Dolphy kay Engracita Dominguez, kasama sina Manuel, Salud, Rodolfo Jr., Wilfredo, at Raul.
Pumanaw naman ang Comedy King noong 2012.
Kabilang sa mga nagawang pelikula ni Edgar ay “Dancing Master,” “Dolphy’s Angels,” “Good Morning Professor,” at “May Pulis, May Pulis sa Ilalim ng Tulay.”
Sa ulat ng PEP.ph, sinabi ng anak ni Edgar na si Egai, na pneumonia ang sakit na ikinamatay ng kaniyang ama.
Nakatakdang i-cremate ang mga labi ng dating aktor ngayong Miyerkules sa St. Peter’s Chapel, Commonwealth Avenue, Quezon City.--FRJ, GMA News
