Napaiyak si Althea Alban matapos siyang komprontahin ng inirereklamo raw niyang si Aiko Melendez ay nag-iingay sa set ng "Prima Donnas."
Pero ang pang-aaway sa kaniya ni Aiko ay prank lang pala.
Sa kaniyang vlog, nagpanggap si Aiko na may narinig siya sa production na nagrereklamo raw si Althea dahil sa malakas na pagpapatugtog ng kaniyang phone, kaya hinarap niya ito.
"Sabi mo daw 'Ang ingay ingay naman ni Ms. Aiko. Bakit ang ingay-ingay?'" tanong ni Aiko kay Althea.
"Wala po akong sinasabi," tahasan namang pagtatanggi ni Althea.
"Kung may problema sa 'kin, sabihin mo, kasi ayaw ko makipagbastusan eh," prank pa ni Aiko sa teen actress.
"Seryoso po kayo?" tanong ni Althea na tila napapaiyak na. "Mukha ba akong nagbibiro?" sagot naman ni Aiko.
Ngunit nauwi naman sa tawanan ang tensyon nang magsigawan na sina Aiko at ang crew ng "It's a prank!"
Sunod namang biniktima ni Aiko si James Blanco, na sa halip na makipagsabayan sa init ng ulo, ipinakita ang kaniyang pagiging gentleman.
Sunod na kinuntsaba ni Aiko si Jillian Ward para i-prank din si Elijah Alejo na pinersonal daw nito ang pananampal sa kaniya ni Jillian.
Ginawa ni Aiko ang prank sa kaniyang co-stars sa last day ng kanilang lock-in taping ng "Prima Donnas." Magtagumpay kaya siya? Panoorin ang video.
—LBG, GMA News
