Ipinaabot ni Kuya Willie Revillame ang kaniyang dasal para sa paggaling ng kapwa niya Kapuso na si Michael V., mula sa COVID-19.
“Gusto ko lang i-get well soon at maka-recover kaagad [ang] kaibigan natin, Michael V. Alam ko may pinagdadaanan ka ngayon. Alay namin sa'yo, tanging pagdadasal ay maka-recover ka agad,” sabi ni Kuya Wil sa kaniyang programa na "Wowowin-Tutok To Win."
Humanga rin si Kuya Wil sa katapangan ni Bitoy na ihayag ang pagsubok na pinagdadaanan nito, kasabay na rin ng paalala sa mga tao na walang pinipili ang COVID-19 kaya dapat mag-ingat.
“Hanga ako sa'yo dahil sinabi mo 'yan. Lalo na sinabi niya sa Facebook niya na 'yun nga ho, naging positive siya ng COVID at hindi natin alam kung bakit. Kaya ho ganu'n katindi 'yang COVID na 'yan. Walang pinipili 'yan, even 'yung presidente ng ibang bansa, even 'yung kung sino mang nanunungkulan,” paalala ng th host.
"Get well soon pareng Michael, Mr. Michael V. Pinagdadasal ka namin, sana maka-recover ka agad para mayakap mo na 'yung mga anak mo at mahal mo sa buhay," dagdag pa ni Kuya Wil.
Ipinagdasal din ni Willie ang lahat ng mga tinamaan ng sakit na sana ay gumaling sila at matapos na ang pandemya.-- Jamil Santos/FRJ, GMA News
