Marami ang nagulat nang ianunsyo ni Paolo Ballesteros ang celebrity guest sa Sabado, Hunyo 20, 2020 na maglalaro sa segment na "Bawal Judgmental" ng "Eat Bulaga'--si Pokwang!.
“Bukas masusubok ang pagka-judgmental ng judge natin for tomorrow, si Pokwang!,” sabi ni Paolo sa pagtatapos ng segment nitong Biyernes.
Dinagdagan pa ito ni Jose Manalo ng biro na, "Naku! Anong masusubok, eh judgemental talaga yan.”
May ilang netizens na nakapanood ng "Eat Bulaga" nitong Biyernes ang nagulat at natuwa nang madinig ang pangalan ni Pokwang.
Hindi kasi sila makapaniwala kung talagang ang komedyanteng si Pokwang ang maglalaro sa Sabado dahil kilala ang aktres na mula sa Kapamilya Network.
Pero sa nakaraang Metro Manila Film Festival, kasama si Pokwang sa pelikulang "Mission Unstapabol: The Don Identity," na pinagbidahan nina Bossing Vic Sotto at Maine Mendoza.
Mapapanood nga ngayon si Pokwang sa "Eat Bulaga" sa Sabado? Abangan bukas ang "Bawal Judgmental." --FRJ, GMA News
