Pumanaw sa edad na 31 si Jorrybell Agoto, ang lead actress ng pelikulang "Filipiñana" na idinirek ni Rafael Manuel.

Kinumpirma ng kapatid ni Jorrybell na si Jed ang malungkot na balita. Sinabi niya sa GMA News Online na pumanaw ang aktres nitong Martes, Nobyembre 17, dakong 5:20 ng hapon.

Nakipaglaban si Jorrybell sa sakit na lymphoma, at naospital dahil sa kaniyang kondisyon. Nasa kritikal na kalagayan din siya at isinailalim sa intensive care.

Nauna nang nanawagan sa publiko ang kaniyang pamilya para sa pinansiyal na tulong upang matugunan ang patuloy na pagtaas ng kaniyang gastusin sa ICU.

Sa panayam ng GMA News Online, sinabi ng director-writer-producer na si Rafael Manuel, hindi kayang ilarawan ng mga salita ang bigat ng nangyari.

“The world has just lost one of its brightest stars. We have just lost a great friend. But our thoughts and prayers go out especially to Jorrybell’s family who have just lost a loving ate and a devoted daughter,” anang director.

Sinabi naman ng mga producer na sina Bianca Balbuena at Bradley Liew, “We are devastated by this news. Not only is she the face of 'Filipiñana' but more than that, she is our friend, our sister, our beloved Jorrybell, ever so funny and kind, sweet and loving. We love her."

"We will always remember her and continue to keep her in our prayers. She can now rest without pain,” dagdag nila.

Ginampanan ni Jorrybell ang karakter ni Isabel, isang 17-anyos na manggagawa sa golf course, sa debut feature film ni Manuel.

Noong 2025, napili rin siyang lumahok sa Berlinale Talents development program.

Sa isang naunang panayam sa Oscar-winning director na si Sean Baker, na nangasiwa sa screening ng pelikula sa Los Angeles, pinuri niya ang pagganap ni Jorrybell bilang si Isabel.

Ayon kay Baker, nagpakita ang aktres ng "lalim sa kaniyang pagganap" sa kabila ng kakaunting dayalogo sa pelikula. Dahil dito, nakasalalay sa kaniyang mga ekspresyon ang pagpapakita ng emosyon at lakas ng karakter.

Sa isang naunang eksklusibong panayam, sinabi naman ni Manuel, “Jorrybell and I worked together ever since the short film, and I think she was still very green. It was one of the first short films she's ever made. And so, it was really a pleasure to grow with her over the seven years and really to grow the character with her over the seven years.”

Nasa intensive care unit (ICU) ng St. Luke's Hospital sa Pilipinas si Jorrybell nang isinagawa ang screening ng pelikula sa Los Angeles. —Janet Susan R. Nepales/FRJ GMA News