Iginiit ni Speaker Martin Romualdez na hinihingi ng Saligang Batas ang pananagutan ng mga opisyal at lider ng bansa na lalabag sa isinasaad nito.

Sa pagdalo ni Romualdez sa pagtitipon ng Philippine Constitution Association (PHILCONSA) para gunitain ang 1987 Constitution Day, binigyan-diin din niya na hindi isang "passive" document ang Saligang Batas.

“It commands obedience, it imposes limits, and most importantly, it demands accountability. It is our collective responsibility to ensure that no institution, no office, and no leader is ever beyond the reach of the law,” ayon sa lider ng Kamara de Representantes.

“We have seen how the Constitution, though written in ink, is tested by the tides of politics, governance, and power. It is resilient, but it is not indestructible. It relies on men and women—lawyers, jurists, scholars, legislators—who believe that no ambition is above the law, and no convenience justifies its disregard,” dagdag pa niya.

Inihayag ni Romualdez ang kaniyang talumpati sa PHILCONSA ilang araw matapos i-impeach ng Kamara si Vice President Sara Duterte.

Sa Articles of Impeachment na ipinadala ng Kamara sa Senado, inakusahan ng mga kongresista si Duterte ng katiwalian, hindi maipaliwanag na yaman, panunuhol, at kasama ang umano'y paglabag niya sa Saligang Batas.

Sa mga nagdaang pahayag, itinanggi ni Duterte ang mga paratang laban sa kaniya, at igiiit na pulitika ang motibo sa likod ng mga alegasyon, kabilang na ang pagkuwestiyon sa paggamit niya ng confidential funds.

Sa talumpati pa rin ni Romualdez sa PHILCONSA, sinabi ng opisyal na ang Konstitusyon ang kaluluwa ng isang bansa at isang kasunduan na nag-uugnay sa mga lider sa kanilang tungkulin at nagprotekta sa mga karapatan ng bawat mamamayan.

Idinagdag pa niya na dapat tiyakin ng mga constitutionalist na ang "rule of law" ay hindi magiging isang simpleng salita lamang.

“We do not simply commemorate a document—we reaffirm a legacy, a duty, and a cause that demands vigilance from all of us. Let this gathering serve as a renewal of that commitment,” paalala ni Romualdez.

“As we honor the legacy of those who framed our fundamental law, let us also recognize our obligation to defend it, interpret it with integrity, and apply it without fear or favor,” dagdag niya. —mula sa ulat ni Llanesca T. Panti/FRJ, GMA Integrated News