Ubod nang suwerte ang pasok ng 2025 sa isang mananaya na solong tinamaan ang P314.5 milyong jackpot prize sa Ultra Lotto 6/58 draw nitong Linggo ng gabi, Enero 5, 2025.
Sa website ng Philippine Charity Sweepstakes Office (PCSO), nakasaad na ang lumabas na mga numero ay 36-46-16-19-23-27, at may kabuuang premyo na P314,591,292.80.
Huling tinamaan ang jackpot sa Ultra Lotto 6/58 noong October 27, 2024 draw, na ang lumabas na mga numero ay 07-24-13-16-10-02, at umabot din sa P321 milyon ang premyo.
Sa inilabas na pahayag noon ng PCSO, nakasaad na isang ginang na mid-30's ang tumama sa draw noong Oct. 27, na kombinasyon ng mga birthdate ng miyembro ng pamilya ang tinayaan.
Sa ilalim ng TRAIN law, may 20% tax ang mga premyo ang higit P10,000.
Samantala, wala namang tumama sa kasabay sa draw nitong Linggo na Superlotto 6/49, na ang lumabas na mga numero ay 12-35-16-07-45-42, at may jackpot prize na P15,840,000.00. -- FRJ, GMA Integrated News
