Winning moment ni Jeremiah Tiangco, balikan sa 'The Clash Flashback Specials'

Muling mapapanood ang winning moment ng Pop Heartthrob ng Imus, Cavite na si Jeremiah Tiangco sa The Clash Season 2 sa limited edition airing ng The Clash Flashback Specials.

Itinanghal si Jeremiah bilang grand champion ng GMA singing competition noong December 15, 2019.

Mula sa 64 na kalahok, lima ang naglaban-laban sa grand finals -- Nef Medina, Jennifer Maravilla, Antonette Tismo, Thea Astley, at si Jeremiah.

Sa limang naglaban-laban, sina Jeremiah at Thea ang pinalad na nakakuha ng pwesto bilang top two Clashers.

Inawit ni Jeremiah ang "I Believe" ni Fantasia Barrino, samantalang inawit naman ni Thea ang "(You Make Me Feel Like) A Natural Woman" ni Aretha Franklin sa finale round kung saan si Jeremiah ang pinaboran ng The Clash panel na sina Asia's Romantic Balladeer Christian Bautista, Comedy Concert Queen Aiai Delas Alas, at Asia's Nightingale Ms. Lani Misalucha.

Sa ikalawang episode ng The Clash Flashback Specials, babalikan nina Jeremiah at Thea ang kanilang one-on-one sing-off at ang winning moment ni Jeremiah, kasama ng Clash Masters na sina Julie Anne San Jose at Rayver Cruz.

Muli ring matutunghayan sa episode ang engrandeng opening number nina Julie Anne, Rayver, The Clash Season 1 winner Golden Canedo, Journey Hosts Ken Chan at Rita Daniela, The Clash panel, at The Clash Season 2 top twelve.

Huwag palampasin ang The Clash Flashback Specials ngayong Linggo, April 25, pagkatapos ng Daig Kayo Ng Lola Ko sa GMA-7.

Samantala, narito ang pasilip sa grand finals ng The Clash Season 2.