Aiai Delas Alas, Christian Bautista, at Lani Misalucha, ano-anong qualities ang hahanapin sa next 'The Clash' grand winner?
Ibinahagi ng The Clash judging panel na binubuo nina Aiai Delas Alas, Christian Bautista, at Ms. Lani Misalucha sa 'The Clash Reunion Live' online show noong Sabado, May 2, ang mga katangian na hahanapin nila sa third season ng Kapuso singing competition.
Ayon kay Lani, hindi naman nagbago ang kanyang criteria sa pagpili ng The Clash grand winner. Aniya, mahalaga ang voice quality, kalakip ang tamang emosyon sa pagde-deliver ng awitin.
"I want the uniqueness and the voice. Dapat 'yung voice quality nando'n, dapat, siyempre, mahusay kumanta, and 'yung pagdeliver ng kanta with emotion," bahagi ng Asia's Nightingale.
"'Yun pa rin sa akin, laging may puso. 'Yun ang lagi kong hinahanap," paalala pa niya.
Para kay Christian, importante ang consistency at willingness na mapabuti ang talento para tanghaling The Clash grand champion.
"Kailangan 'yung fighting spirit mula simula hanggang dulo, e, makikita namin na lagi silang nag-i-improve, laging binibigay 'yung best nila, laging gustong gumaling lang," saad ng Asia's Romantic Balladeer.
Ayon naman kay Aiai, kailangang puno ng energy at emosyon ang bawat performance ng The Clash contestants.
"Kailangan [alive] na [alive] sila. Ang kanilang performance makakarating sa kaibuturan ng puso natin. Talagang [magugulat] ka 'pag nagpe-perform sila, talagang to the highest level," sabi ng Comedy Queen.
Dagdag biro pa niya, kailangang "COVID-19 negative" ang mga sasali sa GMA all-original Filipino singing competition.
Tatanggap ang The Clash ng audition entries hanggang June 28, 2020 sa The Clash Facebook messenger at GMANetwork.com.
