Royal Blood: Pumatay kay Gustavo, malalaman na ngayong Lunes!
Mga Royalistas, ang pinakahinihintay ninyong rebelasyon, mangyayari na ngayong gabi sa Royal Blood!
Kaabang-abang ang mga magaganap ngayong Lunes (September 18) sa Royal Blood dahil malalaman na kung sino ang tunay na pumatay kay Gustavo Royales!
Noong nakaraang linggo, inamin na ni Andrew (Dion Ignacio) kay Margaret (Rhian Ramos) na siya ang sumaksak kay Gustavo noong kaarawan ni Archie (Aidan Veneracion). Nagawa ito ni Andrew dahil sa takot na mawala sa kanya ang lahat matapos na malaman ni Gustavo (Tirso Cruz III) ang affair nito kay Beatrice (Lianne Valentin).
Pero pagtanggi ni Andrew, hindi siya ang lumason kay Gustavo na dahilan ng pagkamatay nito. May katotohanan kaya ang sinabing ito ni Andrew?
Hinala naman ni Beatrice na maaaring nagsasabi ng totoo si Andrew na hindi ito ang lumason kay Gustavo matapos na malaman ang sikretong itinatago ni Cleofe (Ces Quesada)--na anak nito si Emil (Arthur Solinap) at isa itong Royales! Itinanggi naman ni Emil ang bintang sa kanilang mag-ina ni Beatrice na sila ang pumatay kay Gustavo.
Samantala, nalaman na ng lahat ang pagiging dating magkasintahan nina Napoy (Dingdong Dantes) at Diana (Megan Young). Pilit namang pinigilan ni Kristoff (Mikael Daez) ang pag-alis ni Diana sa mansyon dahilan para sabihin na ng huli sa lahat ang itinatago nitong sikreto--na si Kristoff mismo ang pumatay sa kanilang inang si Victoria.
Isiniwalat na rin ni Diana na si Kristoff ang may kagagawan noon ng nangyaring pag-ambush kay Gustavo. Dahil sa mga rebelasyong ito, hinala ng lahat na maaaring si Kristoff ang tunay na salarin sa pagkamatay ni Gustavo.
Tama kaya ang hinala ni Napoy na si Kristoff ang pumatay kay Gustavo? Kayo mga Royalistas, sino ang hinala ninyong tunay na pumatay kay Gustavo?
Ang kasagutan, malalaman na ngayong gabi sa Royal Blood, 8:50 p.m sa GMA Telebabad.
Mapapanood din ang Royal Blood sa Pinoy Hits, I Heart Movies, GTV (10:50 p.m.), at naka-livestream din sa Kapuso Stream.
