Liezel Lopez, ibinahagi ang aral na natutunan niya bilang Sabina sa 'Return To Paradise'

Mayroong mahalagang aral na natutunan ang sexy Kapuso star na si Liezel Lopez mula sa kanyang karakter sa GMA Afternoon Prime series na Return To Paradise.

Sa nasabing show, binibigyang buhay ng StarStruck alumna ang role bilang Sabina, ang ex-girlfriend ni Red Ramos, na ginagampanan ni Kapuso hunk Derrick Monasterio.

Ayon kay Liezel, natutunan niya mula sa kanyang karakter na mayroong tama at maling paraan ng pagmamahal sa tao.

“Sometimes we can love someone na hindi natin kailangan to be with them. You can love them from afar.

"And if you really love someone, you have to set them free para rin maging masaya kayo both,” pagbabahagi niya sa panayam ng GMANetwork.com.

Bukod dito, ramdam naman ng aktres ang kilig mula sa lead stars ng Return To Paradise na sina Derrick Monasterio at Elle Villanueva dahil sa kanilang chemistry on-screen.

Aniya, “Actually grabe 'yung chemistry nila. Pagdating pa lang namin do'n sa island, sobrang sweet na nila, sobrang comfortable with each other. And saksi ako ro'n sa na-build nila na relationship, which is sobrang nag-work don sa characters nila. Kinikilig kami sa set.”

Hindi rin daw kaagad na bumibitaw ang dalawa sa kanilang mga karakter sa tuwing natatapos ang mga eksena nila.

“Off-cam, actually may nasabi si Derrick na… kumbaga 'yung roles nila hindi sila agad-agad bumibitaw pagka-cut. Kung ano 'yung nakikita n'yo on-screen, gano'n din sila off-screen,” kuwento ni Liezel.

Huwag palampasin ang huling dalawang linggo ng Return To Paradise, Lunes hanggang Biyernes, 3:25 p.m., sa GMA Afternoon Prime.

Mapapanood din ang programa online via Kapuso livestream.

SAMANTALA, KILALANIN ANG CAST NG RETURN TO PARADISE SA GALLERY NA ITO.