'Mano Po Legacy: The Family Fortune,' homecoming para kay Maricel Laxa
Tila homecoming daw para sa aktres na si Maricel Laxa ang maging bahagi ng upcoming GMA Telebabad series na Mano Po Legacy: The Family Fortune.
Co-production sa pagitan ng industry giants na GMA at Regal Entertainment at hango sa iconic na Mano Po film series, hatid nito ang isang bagong kuwentong isinulat para sa telebesiyon.
Ayon kay Maricel, parang bumalik daw siya kung saan siya nagsimula nang mapabilang sa star-studded cast ng serye.
"It is also a homecoming for me Kasi I started in GMA. Then, when I was seen by Mother Lily [Monteverde] sa GMA Supershow. That's when she asked me, invited me to be part of Regal Films," kuwento ni Maricel sa virtual media conference ng Mano Po Legacy: The Family Fortune.
Dahil dito, marami raw siyang magagandang alaalang nabalikan.
"Para 'kong nabalik sa mga magagandang memories of my beginnings. I never imagined I'll be here in this season of my life," dagdag pa niya.
Bukod dito, lalo pa raw siyang naging inspired sa trabaho dahil sa co-star na si Boots Anson-Roa.
Hanga raw kasi siya sa longevity nito sa industriya.
"Noong kausap ko kanina si Tita Boots, having had the chance to work with her again this time made me realize I want to be that. She inspired me again. Sabi ko, I never realized that I'll be back I'm here and I want to be just like her," lahad ni Maricel.
Gaganap si Maricel sa serye bilang Valerie Lim, ang common law wife ng Chan family patriarch. Matagumpay niyang napatalsik sa pamilya ang legal wife nito kaya ngayon, sinisikap niyang mamana ng kanyang anak ang business empire.
Abangan ang bagong kuwento ng pag-ibig, pamilya, at tradisyon ng mga Filipino-Chinese sa Mano Po Legacy: The Family Fortune, ngayong January 2022 na sa GMA Telebabad.
