Andrea Torres, babaeng tatanggapin ang lahat para sa pag-ibig sa 'Legal Wives'

Looking forward daw si Kapuso actress Andrea Torres na maibahagi sa mga manonood ang mundo ng upcoming family drama series na Legal Wives.

Pinaka excited daw siyang mapanood ng mga Kapuso ang mga eksena niya kasama ang iba pang mga asawa sa serye na ginagampanan nina Alice Dixson at Bianca Umali.

"Although nagkakasama kami sa taping, lately lang 'yung mga eksenang talagang sabay sabay kaming tatlo sa isang eksena. Nakakatawa kasi iba-ibang characters, iba-ibang personality 'yan mga yan, pinagsama sama mo. Nakakatawa 'yung eksena. Ayokong magbigay ng spoiler pero nakakaaliw," pahayag ni Andrea.

Ang Legal Wives ay kuwento ng isang kakaibang pamilya kung saan pakakasalan ng isang lalaki ang tatlong magkakaibang babae dahil sa iba't ibang mabibigat na dahilan.

Gaganap si Andrea dito bilang si Diane, ang pangalawang asawa ni Ismael na gagampanan ni Kapuso Drama King Dennis Trillo.

Sa tatlong asawa, si Diane lang ang hindi Mranaw. Gayunpaman, pakakasalan siya ni Ismael sa ngalan ng tunay nilang pagmamahalan.

"Si Diane, grabe siya magmahal talaga. Hindi mo makukuwestiyon kung anong kaya niyang gawin pagdating sa pagmamahal niya kay Ismael at sa marriage nila ni Ismael," paliwang ng aktres.

Abangan si Andrea at ang karakter niyang si Diane sa world premiere ng Legal Wives, July 26 sa GMA Telebabad!