Jayson Gainza, may napansin sa pagpapatawa ni John Lloyd Cruz sa 'Happy ToGetHer'
Approved sa Sparkle comedian na si Jayson Gainza ang comedy style ng multi-awarded TV idol na si John Lloyd Cruz sa hit sitcom nilang Happy ToGetHer.
Gumaganap si Jayson bilang ang mekanikong si Mike at single daddy naman na si Julian, ang karakter na pino-portray ni John Lloyd Cruz.
Nakakatuwa ayon sa Kapuso comedian na makita ang funny side ng seasoned actor na nakilala sa larangan ng drama at romcom projects.
Lahad ni Jayson sa GMANetwork.com, “May humor si John Lloyd Cruz, minsan humirit at pasok lagi siya.
“Nakita ko lang na 'yung heartthrob image niya, nababali niya 'yung pagseseryoso niya sa comedy. May timing, mahirap 'yung pag-aralan at pakiramdaman, para sa kanya given na 'yun.”
Samantala, humahanga rin siya sa kanyang co-star na si Ashley Rivera na ginagampanan ang role bilang sexy secretary na si Pam.
“Si Ashley Rivera magaling, may sariling style, at stick sa character at may timing din,” ani Jayson.
Sa isang taon na pag-ere ng Happy ToGetHer, ilan sa sikat na celebrities ang nag-guest na sa kanilang show.
Sino kaya sa mga ito ang favorite na nakatrabaho ni Jayson?
Pag-amin ng comedian, “Ang paborito ko si Bianca Umali na nag-guest kasi siya gumanap na Basha/Issa. Nung una nahihiya pa ako kaya kinausap ko siya sa mga gagawin at ia-adlib ko, lumabas naman. Maganda 'yung aming eksena at bagay sa sitcom, nakakasabay siya.”
MEET SPARKLE COMEDIAN JAYSON GAINZA IN THIS GALLERY:
