Liza Soberano, nilinaw ang pagiging 'ungrateful' niya sa takbo ng karera

Sa isang exclusive interview sa Fast Talk with Boy Abunda, nilinaw ng aktres na si Liza Soberano ang mga naging pahayag niya sa kaniyang vlog tungkol sa naging takbo ng kaniyang karera.

Inamin ni Liza sa TV host na si Boy Abunda na sa una ay ayaw niyang gawin ang panayam ngunit tingin niya ay kinakailangan niyang ipaliwanag ang kaniyang sarili dahil masyadong nabigyan ng ibang kahulugan ang naging transition ng kaniyang “rebranding.”

Aniya, “I started having feelings of regret because there were so many interpretations of what I said. It was getting so noisy. So many thoughts and opinions were coming in. I felt I needed to defend myself.”

Bukod dito, diretsahan ding sinabi ni Liza kay Boy na nasaktan siya sa sinabi ng TV host na “disappointed” ito sa kaniya dahil sa kaniyang mga sinabi sa kaniyang vlog na pinamagatang “This is Me.”

Aniya, “Na-hurt ako kasi feeling ko of all people ikaw 'yung makakaintindi, because you know I see you as one of the wisest in the industry and sa dami ng napagdaanan mo with different personalities, parang you always saw things for what they worth and parang ang paniniwala ko your judgment isn't clouded by the noise of the media, by what the fans say, so parang I felt like misunderstood by you.

“But then nung nag-usap naman kayo ni James [Reid] he talked to me after and in-explain niya sa akin 'yung thought process mo about everything and I understood your point. It really did make sense to me and so yeah that's why I wanted to have this conversation with you.”

Isa sa mga nilinaw ni Liza ay ang pinanggalingan ng kaniyang sinabi sa naturang vlog na tila hindi nahingi ang kaniyang input sa mga naging proyekto niya noon.

Ayon kay Liza, “Naranasan ko naman na I was given some right to have some kind of 'approved' certain things that were going on in my career. But I was never empowered na mag-isip on creating or sharing ideas of how I could grow my career or bring it into a different direction. Parang before, concepts, movie concepts, endorsements were always pitched to me, and they would give me their recommendations.”

Paglalahad pa ng aktres, bata pa lamang siya nang magsimulang pasukin ang show business kung kaya't wala siyang kaalam-alam kung paano ang trabaho dito at kung paano ito tumatakbo.

Kuwento niya, “Nag-start po kasi ako na bata pa lang ako and wala po talaga akong alam sa entertainment or showbiz. And all the knowledge that I have now, came from my experience growing up in showbiz. So everything that I knew, was based on what every people in the entertainment industry taught me and what the industry demand it from me.

“So even my perception of things was all dictated by what the environment I grew up in and the experiences that I had.”

Hindi rin itinatanggi ni Liza na nagkaroon naman siya ng sariling desisyon sa ibang mga bagay pero hindi niya ring ito inaari dahil para ito sa kaniyang fans at sa mga taong gusto niyang pasayahin.

“So yes I may have made some decisions for myself, I may have agreed to doing certain things but I wouldn't say that they were completely my own kasi I had fans to cater to. I had a family to provide for. I had people in the industry that I wanted to impress or make proud,” ani Liza.

Dagdag pa niya, “I didn't grow up learning how to choose things for myself and really deciding on what I want. It was always dictated by what people think is what's right for me.”

Nilinaw din ni Liza na desisyon niya ang sundin ang kaniyang management noon dahil alam niya ang kakayahan nito pagdating sa industriya.

“Kasi masunurin naman ako and alam ko that everybody that was part of my journey, everybody that I have worked with, Tito Ogie [Diaz], ABS-CBN, Quen [Enrique Gil], the management, they were all knowledgeable on what they do, they were very experienced in showbiz,” paglalahad ni Liza.

Muli naman itong klinaro ni Boy, “At ina-acknowledge mo 'yan na natulungan ka nilang lahat?”

“Opo,” sagot ni Liza.

Para naman sa iba pang maiinit na showbiz balita, tumutok sa Fast Talk with Boy Abunda, Lunes hanggang Biyernes, 4:45 p.m. sa loob ng 20 minuto sa GMA Afternoon Prime via television broadcast sa GMA at sa iba pang digital platforms.