Chariz Solomon, inaming introvert sa totoong buhay
Game na game na sumalang sa Fast Talk with Boy Abunda ang Kapuso comedienne na si Chariz Solomon kasama ang batikang TV host na si Boy Abunda, ngayong Lunes, May 1.
Bukod sa kaniyang buhay-pag-ibig at pagiging isang celebrity mom, tinanong din ni Boy si Chariz tungkol sa isang paniniwala pagdating sa mga komedyante.
“May mga nagsasabi na ang mga komedyante, sa totoong buhay they are actually very quiet, most of them are introverts,” ani Boy kay Chariz.
Aminado naman si Chariz na mas gusto niya ang pagiging mag-isa at tahimik. Aniya, “Ano po ako siguro mga nasa 70% introvert, kasi mas na-e-enjoy ko sa bahay dahil tahimik, kaya kapag nagha-hire ako ng helper, isa lang ang gusto ko tapos sasabihin ko sa kaniya, 'Uy hindi ako makuwento a, 'yung napapanood mo sa tv na [madaldal], dito sa bahay hindi.'”
Ayon pa sa actress-comedienne, “Hindi talaga ako mahilig makipagkuwentuhan ng wala lang so na-e-enjoy ko 'yung silence at kapag mag-isa ako minsan.”
Mapapanood si Chariz sa longest-running comedy gag show sa bansa na Bubble Gang at sa weekend comedy program na Pepito Manaloto: Tuloy ang Kuwento.
Para naman sa iba pang maiinit na showbiz balita, tumutok sa Fast Talk with Boy Abunda, Lunes hanggang Biyernes, 4:45 p.m. sa loob ng 20 minuto sa GMA Afternoon Prime via television broadcast sa GMA at sa iba pang digital platforms.
SILIPIN NAMAN ANG MOMMY MOMENTS NI CHARIZ SOLOMON SA KANIYANG TATLONG ANAK SA GALLERY NA ITO:
