Carla Abellana, nagkuwento tungkol kay Delia Razon sa 'Family Feud' bago ito pumanaw
Ilang araw bago pumanaw ang beteranang aktres na si Delia Razon ay naging guest ang apo niyang si Carla Abellana sa Family Feud.
Sa taping na ginanap noong March 12 ay kinumusta ng Family Feud host na si Dingdong Dantes ang lola ni Carla. Si Delia o Lucy May G. Reyes sa totoong buhay ay pumanaw noong March 15.
Kuwento ni Carla, "Okay naman, malakas pa rin thankfully. Mag-95 na siya this year."
Itinanong din sa aktres kung gaano sila kadalas magkita ng kaniyang lola.
Ani Carla, "Bihira na lang. Siguro once a month nakikita namin siya kasi siyempre mas mahina na siya, prone to illnesses. Nag-iingat din kami na mag-visit sa kaniya."
Ipinakita rin sa programa ang side by side photos ni Carla at kaniyang lola Delia. Saad ni Dingdong, "Two beautiful of their generations, sinide by side natin."
Sagot naman ni Carla, "That's my lola! Ang aking lola, beautiful!"
Kahapon, March 16, nag-post si Carla ng malungkot na balita tungkol sa pagpanaw ng kaniyang lola. Saad sa larawan na ibinahagi ni Carla, "Celebrating the life of Lucy May G. Reyes 'Delia Razon' August 8, 1930 - March 15, 2025."
Samantala, sa isang Instagram post ngayong March 17, inilarawan naman ni Carla ang kaniyang lola. Anang Kapuso star, "The strongest, bravest, fiercest and most beautiful"
Mapapanood ang pagbisita ni Carla sa Family Feud sa darating na Biyernes (March 21), 5:40 p.m. sa GMA Network.
