Alden Richards, muling mapapanood sa 'All-Out Sundays'

Matapos bumida sa historical drama series na Pulang Araw, magbabalik telebisyon na si Alden Richards ngunit hindi sa isang bagong serye, kundi bilang performer at isa sa mga host ng Sunday noontime variety show na All-Out Sundays.

Kuwento ni Alden sa panayam niya kay Aubrey Carampel para s a 24 Oras Weekend nitong Sabado, January 25, ay magbabalik na siya sa naturang noontime variety show ngayong February 9.

“Babalik tayo as like what we used to before; host and prods din, as well. Nakaka-miss din, lahat sila du'n good friends natin and siyempre para get the chance din to meet the new ones as well, the new artists ng All-Out Sundays so excited ako,” sabi ni Alden.

Pagbati pa niya, “See you, mga Kapuso!”

BALIKAN ANG ILANG LITRATO NI ALDEN SUOT ANG KANIYANG DAZZLING SUITS SA GALLERY NA ITO:

Nilinaw naman ni Alden na pahinga lang siya muna sa paggawa ng mga serye at ready naman umano ang Asia's Multimedia Star kung sakaling may dumating na “right project” para sa kaniya.

“For me, siguro a different type of storytelling perhaps, 'yun 'yung isa sa pinag-uusapan namin ng management right now, but we'll see,” sabi ng aktor.

Samantala, isang araw bago ang Valentine's Day ay mapapanood na rin ang pelikulang pinagbidahan nila ni Kathryn Bernardo na Hello, Love, Again sa online streaming service na Netflix.

“Very happy, we're very excited po na finally it's gonna be available in Netflix po this coming Feb 13,” sabi ni Alden.

Na-postpone ang pagpapalabas ng Hello, Love, Again, at maging ng Metro Manila Film Fest entry na Green Bones sa Manila International Film Festival dahil sa wildfire na tumupok sa maraming kabahayan at ari-arian sa Losa Angeles, California.

Panoorin ang All-Out Sundays tuwing Linggo, 12 noon, sa GMA.