Buboy Villar, sinagot ang mga akusasyon ng ex-GF na si Angillyn Gorens

Humarap si Buboy Villar sa isang panayam upang maglabas ng saloobin at magbigay-linaw tungkol sa mga akusasyon sa kaniya ng ex-girlfriend na si Angillyn Gorens.

Sa isang mahabang post sa Facebook nitong March 26, sinabi ni Angillyn na sinasaktan siya diumano ni Buboy.

Lahad ni Angillyn, “Sinaktan niya ako, kaunting away lang mananakit na [siya] dahil alam niyang hindi ako magsusumbong sa mga magulang ko…”

Binaggit din ng ex-partner ni Buboy na minsan daw binagga nito ang sasakyan nila kung saan lulan ang anak nila na si Vlanz.

“Binangga [niya] 'yung kotse naming… dahil nagtalo kami. Nandoon ['Yung] anak ko pero nagawa niya 'yon…”

Nabanggit din ni Angillyn sa kaniyang post na halos dalawang taon nang hindi nagsusustento ang comedian-vlogger at hindi nito naalagaan ang kanilang mga anak.

Sa report ng 24 Oras kagabi, March 27, pinabulaanan ni Buboy na sinaktan niya si Angillyn.

"Dumaan sa buhay ko po na 'yung tatay ko din ay nananakit sa aking nanay. Alam ko po na mali ang manakit ng babae. Mahal na mahal ko 'yung nanay ko kaya kahit kelan [ay] 'di ko maiisipan na saktan siya. Malabo po," saad pa niya.

Nagpaliwanag rin ang Kapuso actor sa alegasyon ni Angillyn na hindi siya nagbibigay ng financial support.

Binigyan-diin ni Buboy na nakausap na niya ang magulang ng dating partner tungkol dito.

Ayon sa aktor, "Napag-usapan na po kasi namin 'yan, dati pa sa VAWC. Napag-usapan namin ito nang legal at approved ito ng VAWC last year, I think, last year"

"Nakipag-meeting ako [sa] mommy niya at saka nung daddy niya nandoon kami, nag-usap kami. Sinabi ko talaga kung ano 'yung parang kaya ko as a father, so naisarado naman po namin nang maayos 'yon kaya 'yung mga ganitong pangyayari, kung iisipin kong mabuti po, nakakalungkot."

Patuloy pa niya, "Hindi ako para manira ng tao kasi 'yan ang pinaka ayoko, 'yung may sasabihin ako sa isang tao na hindi naman po totoo. Kaya 'yung mga gano'ng bagay po, pinagdadasal ko na lang po talaga Sir. Nelson. Kasi, unang-una po sa lahat 'yung mga ganitong usapan nasa tamang venue po dapat."

Sa isang bahagi ng panayam hiningan ng mensahe si Buboy para kay Angillyn?

Tugon niya, "Siguro 'yung sinasabi po ng utak ko at damdamin, parang kailangan ko muna sigurong magpakalma muna, ikalma ko talaga 'yung sarili ko. Parang kailangan ko kumapit muna siguro sa proseso na ito, kailangan kong yakapin 'yung sakit at bitawan later on. Nandoon pa rin naman po 'yung magpatawad,”

Noong March 22 sa Your Honor, ipinakilala ni Buboy sa publiko si Isay Sampiano bilang girlfriend niya at dito rin niya ni-reveal na may baby boy na sila na si Kyrie Astraeuz Miamor.

Dalawa naman ang anak ni Buboy kay Angillyn na sina Vlanz at George.

Samantala, balikan ang timeline ng relasyon ng dating magkasintahang sina Buboy at Angillyn dito: