Xian Lim, kinikilig sa titulong direktor: 'Mas magandang pakinggan'
Pansamantalang isinantabi ni Xian Lim ang pagiging aktor upang i-promote ang bagong pelikulang kanyang idinirehe, ang Hello, Universe, na ipalalabas sa mga sinehan simula January 25.
Sa ginanap na press conference ng naturang pelikula nitong Huwebes, January 12, tinanong ng GMANetwork.com kung sa aling titulo siya kinikilig kapag naririnig, aktor o direktor.
Napangiti si Xian bago sumagot na, “Siyempre, mas nakakakilig yung direktor kasi yun po talaga yung gusto kong gawin. This is the story I always tell whenever I get to direct a project. Since 2009 po, yung pinakauna kong Cinemalaya film na Two Funerals, gusto ko na po talagang maging parte behind the camera. So yun, mas kinikilig po talaga ako doon, mas magandang pakinggan.”
Ang unang directorial debut ni Xian ay ang 2019 Cinemalaya movie na Tabon. Naging direktor din siya ng music video ng kanta ni Glaiza de Castro na “Tawid Dagat.” Gayundin, sa GMA Network, nabigyan siya ng pagkakataong magdirek ng isang episode ng Wish Ko Lang.
Sa press conference ng Hello, Universe, inilahad ni Xian na kakaiba ang pakiramdam niya kapag nasa likod ng kamera.
“Ibang-iba,” diin niya. “I think yung being able to create something out of nothing. I've always wanted to try, I've always wanted to direct. And ako, yung mga frustrations ko as an actor, nailalabas ko rito. Ito yung alam ko kung pagod na sila, alam ko kung ayaw na nila o hindi na sila kumportable. So, sana magawa ko pa siya ng maraming beses.”
Bagamat ikinalulugod niya ang pagiging direktor, hindi naman daw niya maiiwan ang kanyang trabaho bilang aktor.
Sabi ng 33-year-old actor-director, “Hindi naman po talaga maiiwan ang pagiging isang aktor. Kumbaga, nandito po talaga 'yan sa puso, hinding-hindi mawawala.
“But having the opportunity to tell your story, having the opportunity to write and be part of every step of the filmmaking process is another fulfillment, it's another feeling. Hopefully, in the future, makagawa pa po ng marami.”
Hearts on Ice
Samantala, bukod sa Hello, Universe, sabik na rin si Xian na makita ng mga manood ang figure skating-series ng GMA Network, ang Hearts On Ice, kung saan makakasama niya si Ashley Ortega.
Bilang paghahanda, sumailalim sa figure skating lessons si Xian para magampanan nang husto ang kanyang karakter.
“With Hearts on Ice, it's a different feel kasi ako, basketball talaga ang buhay ko. Talagang tinaga ko na sa bato na dito ako sa basketball. Pero when Hearts on Ice came, I immediately took it, nag-enroll na ako sa skating, maya't maya nandoon na ako. I'm learning all the moves.
“Hindi ko sinasabing makikita n'yo yung sa series lahat, but I think it's my way of respecting the material to be believable, para mapaniwalaan. I just want people to see na I put in the work. Hindi man ako yung pinakamagaling sa yelo, I wanna be the hardest working person in the room,” kuwento niya.
“Makikita n'yo akong sumasayaw doon,” sabi ni Xian, sabay biro na, “Baka malito lang kayo kung sino sa amin ni Michael Martinez ang magaling. Hindi ko lang alam ha. Ayaw ko siyang ma-outshine.”
Agad naman niyang nilinaw, “Hindi, biro lang. Nagpapaturo ako sa kanya. Hindi ko pa rin siya gamay pero it's a work in progress.”
Sa huli, hinikayat niya ang mga manood na abangan ang Hearts on Ice sa telebisyon.
“I think yung kakaibang tema, wala pa tayong ganung klaseng story. Yung story, medyo may familiar na kayong mapapanood. Pero everything happening on ice, it's something new for the audience. Sana mabigyan nila ng chance,” pagtatapos ni Xian.
SAMANTALA, ALAMIN KUNG SINU-SINO PA ANG MGA MAKAKASAMA NINA XIAN AT ASHLEY SA HEARTS ON ICE SA GALLERY NA ITO:
