Michael V, pinabulaanan ang kumakalat na 'campaign material' gamit ang kanyang lumang IG post
Iginiit ni Comedy Genius Michael V na ang kumakalat na sketch at post niya patungkol kay Pangulong Rodrigo Duterte ay mahigit apat na taon na mula nang ito'y kanyang ipinost.
Aniya, ginagamit umano ang naturang post para gawing campaign material at mariin niyang tinututulan ito.
Binigyang-diin niya ang sentimyentong ito sa kanyang Instagram post.
Aniya, “Madalas kong nakikita sa circulation 'tong quote ko na 'to which I posted more than four years ago nu'ng nanalo si Digong as President, to encourage people to accept and respect the election results, consistent with the “Dapat Tama” campaign na ginawa ko with GMA Network.
“To set the records straight, it's not a recent post. Please pay attention to the last line na all caps.
"I have no problem with people using it for the right reason pero huwag po nating gamiting campaign material. #FakeNews.”
Bukod dito, may kumakalat din umanong campaign si Michael V na naglalaman ng kanyang opinyon at saloobin tungkol sa kasalukuyang administrasyon.
IAT: Pekeng campaign material ni Michael V
Source: @michaelbitoy
Samantala, patuloy pa ring nagpapagaling mula sa COVID-19 ang komedyante mula nang magpositibo ito sa sakit nitong July 15.
Makaraang kumpirmahin ang balita ay agad namang bumuhos ang panalangin at suporta kay Michael V mula sa kanyang mga kapwa artista, kaibigan at fans.
Sa eksklusibong panayam ng 24 Oras sa kanya nitong July 22, ibinahagi niyang unti-unti na siyang nakaka-recover sa sakit.
