Popular Filipino comedians who also nailed dramatic roles

Maliban sa pagiging komedyante, kilala rin si Paolo Contis sa kaniyang galing pagdating sa drama films. Pinaulanan ng magagandang komento ng netizens ang kaniyang mahusay na pagganap sa ilang pelikula gaya ng 'Through Night and Day' at 'A Faraway Land.'

Mapa-comedy man gaya ng 'Iskul Bukol' o drama gaya ng Lenten specials ng Eat Bulaga, alam na alam na ni Bossing Vic Sotto, kung paano pasayahin at paiyakin ang mga Kapuso viewers! Hindi rin nawawala ang elemento ng drama sa halos lahat ng kanyang comedy movies.

Kayang-kaya rin nina Jose Manalo at Wally Bayola makipagsabayan pagdating sa drama! Balde ng luha ang pumapatak sa mata ng Kapuso viewers sa tuwing may gagampanan silang role sa drama anthology show na 'Magpakailanman.'

Sino ba naman ang makakalimot kay Allan K? Alam na alam ng lahat na hindi lang sa pagiging singer, komedyante at TV host magaling si Allan kung hindi pati sa drama roles!

Noong nakaraang January 2022, napanood si Pokwang sa isang episode ng '#MPK o Magpakailanman,' kung saan gumanap siya bilang isang nanay na kontesera. Samu't saring papuri ang natanggap niya mula sa Kapuso viewers dahil sa kaniyang mahusay na pag-arte. Noong 2018, umani ng mga nominasyon at ginawaran siya bilang Best Actress para sa pelikulang 'Oda sa Wala' ng QCinema International Film Festival.

Sa taong ito, ipanamalas ni Comedy Queen Aiai Delas Alas ang kaniyang husay sa drama sa kaniyang GMA Afternoon Prime series na 'Raising Mamay,' kung saan gumanap siya bilang si Letty. Bago ito, kinilala sa abroad ang husay ni Aiai sa pag-arte sa indie movie na 'Area' at nagwagi rin siya ng Best Actress sa Cinemalaya para sa pelikulang 'School Service' noong 2018.

Hindi lang sa pagpapatawa magaling si Eugene Domingo. Local man o international, talagang napapansin ang kaniyang husay sa drama. Noong 2013 ay nanalo siya bilang Best Actress sa 6th Tokyo International Film Festival para sa pelikulang 'Barber's Tales.'

Tulad ng kaniyang amang si Dolphy, mahusay rin si Epy Quizon sa pagpapatawa. Ngunit sa isang interview, nabanggit ni Epy na gusto niyang makilala bilang isang versatile actor kung kaya't pinasok niya na rin ang mundo ng drama at action. Kasama ang kanyang yumaong ama at kapatid na si Eric Quizon, nagpaantig ng mga damdamin si Epy sa pelikulang Markova: Comfort Gay (2000). Magkahalong kilig at drama naman ang naramdaman ng mga manonood sa pelikula niyang 'The Art of Ligaw' (2019), kung saan nakapareha niya si KZ Tandingan.

Bukod sa pagiging komedyante, kilala rin si Gardo Versoza sa pagiging isang mahusay na aktor. Napanood na siya sa programa ng GMA tulad ng 'Kung Mahawi Man Ang Ulap,' 'Amaya,' at 'Bolera.'

Bukod sa kanyang sikat na linya na 'Go Go Go,' kilala rin si Rufa Mae Quinto sa husay nitong pag-arte. Isa sa kaniyang pinagbidahan ay ang pelikulang 'Mano Po 4: Ako Legal Wife,' na ipinalabas noong taong 2005 na kinabibilangan din ng ilang mga batikan na aktres tulad nina Cherry Pie Picache at Zsa Zsa Padilla.

Pinatunayan din ni Empoy ang kaniyang galing sa pag-arte noong gumanap siya sa isang sikat at hataw sa takilyang pelikula na 'Kita Kita,' kung saan nakasama niya si Alessandra de Rossi. Matatandaan na ang palabas na ito ay naging usap-usapan at umani ng magagandang papuri mula sa mga manonood.