IN PHOTOS: Ang mga karakter sa 'Boys Over Flowers'
Inihahandog ng GMA Heart of Asia sa taong 2021 ang award-winning 2009 South Korean drama na 'Boys Over Flowers.'
Kuwento ito ng isang charming at palaban na high school student na nakadaupang-palad ang apat sa pinakamayayamang estudyante ng isang popular at prestihiyosong eskwelahan.
Tampok dito ang pinakamalalaking pangalan sa South Korea - sina Lee Min-ho, Kim Hyung Joong, Kim Bum, Kim Joon, at Ku Hye Sun.
Sa hindi inaasahang pangyayari ay nakilala ni Geum Jan-di (Ku Hye Sun), na mula sa payak na pamilyang nagmamay-ari ng dry cleaning store, ang infamous group na binubuo nina Gu Jun-pyo (Lee Min-ho), Yoon Ji-hu (Kim Hyung Joong), So Yi-jung (Kim Bum) and Song Woo-Bin (Kim Joon) o mas kilala sa tawag na F4.
Dahil sa kanyang katapangan, nakapasok siya sa tanyag na Shin Hwa High School na tanging mayayaman lamang ang nakapag-aaral.
Sa kasamaang-palad ay na-offend niya ang leader ng F4 na si Gu Jun-pyo. Dahil dito, siya na ang magiging tampulan ng iba't ibang pranks at pambu-bully ng grupo.
Pero hindi nagpatinag si Geum Jan-di sa pagpapahirap ng grupo sa kanya at mas lalo pa niyang nilakasan ang loob para kalabanin sila, lalo na si Jun-pyo.
Kinakitaan ni Jun-pyo si Jan-di ng kakaiba at natatanging ugali na hindi pa niya nakikita sa ibang babae kaya naman naging interesado siya rito.
Hindi niya namalayan na unti-unti na rin pa lang nahuhulog ang loob niya rito. Pero paano kung ang best friend niyang si Yoon Ji-hu ay lihim na may gusto rin pala kay Jan-di?
Sinong magwawagi sa puso ni Jan-di?
Abangan ang kanilang kuwento sa romantic-comedy series na 'Boys Over Flowers,' ang unang pasabog ng GMA Heart of Asia sa 2021.
Samantala, mas kilalanin pa ang mga karakter ng 'Boys Over Flowers' sa gallery na ito:
Lee Min-ho bilang si Gu Jun-pyo
Si Gu Jun-pyo ang leader ng F4 at tagapagmana ng Shinhwa Group, isa sa mga pinakamakapangyarihang business group sa South Korea. Siya ang magbibigay ng pagsubok at kulay sa buhay ni Jan-di.
Kim Hyung Joong bilang si Yoon Ji-hu
Si Yoon Ji-hu ay miyembro ng F4 at best friend ni Gu Jun-pyo. Siya ang apo ng dating presidente ng South Korea. May angking talento sa musika si Ji-hu, na naging isa sa mga dahilan kung bakit humanga sa kanya si Jan-di.
Kim Bum bilang si So Yi-jung
Si So Yi-jung ang ikatlong miyembro ng F4. Isa siyang skilled potter at pagmamay-ari ng pamilya niya ang isa sa pinamalalaking art museum sa bansa. Mayroon siyang playboy image ngunit magbabago ito nang makilala niya si Chu Ga-eul, ang best friend ni Jan-di.
Kim Joon bilang si Song Woo-Bin
Siya ang ikaapat na miyembro ng infamous F4. Ang pamilya niya ang nagpapatakbo ng isang malaking construction company sa South Korea.
Ku Hye Sun bilang si Geum Jan-di
Si Geum Jan-di ang babago sa buhay ng F4. Mula sa pagiging worst enemy, kalaunan ay si Jan-di ang magbibigay ng kulay at saya sa mundo ng grupo.
Kim So-eun bilang si Chu Ga-eul
Si Chu Ga-eul ang loyal best friend ni Jan-di na co-worker din ng huli sa isang porridge shop. Nahulog ang loob niya sa gwapong si So Yi-jung.
Secret crush
Hindi maamin ni Geum Jan-di ang lihim niyang pagtingin kay Yoon Ji-hu dahil may iba itong mahal. Hindi rin naman malinaw sa binata ang tunay niyang nararamdaman para kay Jan-di.
Fall in love
Hindi inakala ni Gu Jun-pyo na mahuhulog siya sa charm at kakaibang fighting spirit ni Geum Jan-di.
