"Eyy" moment nina Nesthy Petecio at PBBM, kinaaliwan sa Palasyo
Isa sa mga nag-uwi ng prestihiyosong medalya mula sa Olympics 2024 ay ang Filipina boxer na si Nesthy Petecio. Dahil sa kanyang husay, nakuha niya ang bronze medal sa women's boxing 57kg division, kung saan nakalaban niya ang Polish boxer na si Julia Szereneta.
Kaya nang umuwi siya sa Pilipinas kahapon, August 13, sinalubong siya ng isang mainit na pagtanggap, kasama ang iba pang mga atleta na lumaban din sa Olympics.
Bilang pagkilala sa kanyang tagumpay, ginawaran din siya ng Presidential Citation at PhP2 million mula sa Opisina ng Pangulo.
Nakasulat sa karangalan, "Ferdinand R. Marcos Jr., President of the Republic of the Philippines, presents this presidential citation to Nesthy Petecio, in recognition of exemplary performance in the 2024 Paris Olympics by virtue of her bronze medal finish in boxing women's 57 kg, for demonstrating the Olympic ideals of excellence, respect, and friendship, thereby giving honor and pride to the Filipino nation and for inspiring Filipino athletes to dream, aspire for, and achieve Olympic feats..."
Sa gitnang bahagi ng award ceremony, naging tampok ang nakakatuwang interaksyon nina Nesthy at Pangulong Ferdinand "Bongbong" Marcos, Jr. Pagkatapos matanggap ng bronze medalist ang pagkilala, nag-selfie pa siya at tinuruan ang Presidente gawin ang kilalang hand sign na "Eey." Kitang-kita sa live stream ng seremonya na nagbigay ito ng kasiyahan sa lahat ng dumalo, lalo na sa mga kapwa Pilipinong atleta.
Bilang karagdagang gantimpala, bibigyan din si Nesthy ng amity card mula sa Movie and Television Review and Classification Board (MTRCB) at travel tax exemption mula sa Tourism Infrastructure and Enterprise Zone Authority (TIEZA). Kasama rin siya sa mga makakatanggap ng isang milyong piso mula sa gobyerno at iba pang insentibo sa ilalim ng National Athletes and Coaches Benefits and Incentives Act.
Kilalanin pa si Nesthy Petecio sa gallery na ito:
