Zephanie, excited sa bagong teen drama na 'MAKA'

Thankful ang singer-actress na si Zephanie sa oportunidad na mapasama sa cast ng upcoming teen drama ng GMA Public Affairs, ang MAKA.

Sa story conference ng MAKA noong Martes (August 6), ipinarating ni Zephanie ang excitement na mapanood ng lahat ang inaabangang show.

"MAKA would be filled with life, art, and passion. I'm sure maraming makaka-relate sa inyong lahat lalong-lalo na 'yung may puso sa musika, sa pagsayaw, sa Art," sabi ng singer-actress.

Dagdag ni Zephanie, "Sobrang excited po ako na gawin itong show na ito, lalo na recently lang po we launched the 'Mga Batang Riles,' so it kind of different from this one kasi 'yon po drama action and this one will be drama and romantic din. Excited kami na i-share ito sa inyong lahat."

Bukod sa show, na-excite din si Zephanie na makatrabaho ang kapwa niya Sparkle stars na sina Marco Masa, Ashley Sarmiento, Dylan Menor, John Clifford, at Olive May.

"Sobra po akong nagpapasalamat na binigyan n'yo po kami ng opportunity to all work together. I am so excited po and I'm just praying the passion na mas mag-fire up siya inside of us so we can all give our best.

"I believe that lahat tayo gusto nating maging successful ito, so looking forward to learning new things from all of you and from our production team."

Makakasama rin ni Zephanie sa MAKA ang seasoned actor na si Romnick Sarmenta, na makikilala bilang Sir V, isang accomplished but infamous artist na umuwi sa kanyang bayan para maging isang Arts and Performance teacher.

Tampok sa MAKA ang kuwento ng anim na high school students na sina Zeph (Zephanie), Marco (Marco Masa), Ash (Ashley Sarmiento), Dylan (Dylan Menor), JC (John Clifford), at Livvy (Olive May) na naka-enroll sa Arts & Performance (A&P) section ng public school na Douglas Mac Arthur High School for the Arts.

Abangan si Zephanie sa bagong Saturday teen drama na MAKA, ngayong September sa GMA.