IN PHOTOS: Triumphs and challenges of Super Tekla

Galing sa isang broken family si Super Tekla o Romeo Librada. Naninirahan siya noon sa kabundukan ng North Cotabato. Walo silang magkakapatid ngunit nawalay sila sa isa't isa nang namatay ang kanilang ina noong nine-months-old pa lamang si Tekla.

Lumaki si Tekla sa kanyang lolo. Nagbenta siya ng mga tanim upang mapag-aral ang sarili at nakatapos siya ng high school.

Lumuwas sa Maynila si Tekla noong 22 taong gulang siya at umasang dito niya matutupad ang kanyang mga pangarap.

Nagkaroon ng relasyon sa isang lalaki si Tekla at umabot ito ng isang taon. Nasaktan daw si Tekla matapos siyang iwan ng kanyang boyfriend dahil sa isang babae.

Sampung taon ang itinagal ng relasyon nina Tekla at Irene at biniyayaan sila ng anak. Naghiwalay sila dahil lumalim na ang problema sa kanilang pagsasama.

Ngayon ay nasa pangangalaga ng biyenan ni Tekla ang kanyang anak.

Mahilig daw kumanta sa mga mall si Tekla. Habang nasa videoke, nakilala niya ang kanyang tinawag na fairy god mothers na sina Tolits at Jimmy, ang mga taong naglapit sa kanya sa kanyang pangarap.

Dinala nina Tolits at Jimmy si Tekla sa Punchline, isang comedy bar sa Quezon Avenue, Quezon City. Inimbitahan si Tekla sa stage at kinanta niya ang 'Power of Love' ni Celine Dion. Natuwa ang audience sa galing ni Tekla sa pagkanta at umabot ang tip na kanyang nakuha sa Php 35,000.

Ngunit dahil iniwan ng kanyang pamilya at dala na rin ng kalungkutan, mali ang landas na tinahak ni Tekla. Gumamit siya ng bawal na gamot at dito na nagsimula ang kanyang pagbagsak.

Naubos daw ang lahat ng ipon ni Tekla. Pati ang kanyang mga kaibigan sa comedy bar ay nagalit sa kanya dahil sa kanyang bisyo.

Nagulat na lamang daw siya nang imbitahan siya ni Donita Nose, ang kanyang katrabaho sa Punchline noon, na maging contestant sa 'Wowowin.'

Sa unang pagkakataon ay lumabas si Tekla sa 'Wowowin.' Naging viral ang video ng kanyang appearance sa naturang Kapuso show.

Ayon kay Tekla, hindi siya tinigilan ni Donita Nose at napapayag na rin siyang maging host ng 'Wowowin.'

Naging patok na patok si Tekla sa 'Wowowin' lalo na ang tambalang DonEkla.

Sa exclusive interview ng '24 Oras,' pinabulaanan ni Tekla na muli siyang gumagamit ng bawal na gamot.

Hindi nakalimot si Tekla na magpasalamat at magpakita ng utang na loob. Naging pahayag niya, “Kuya, never ako nagkaroon ng sama ng loob kasi 'yung binigay mo sa 'kin, though it's not just the financial, inaani ko na siya at aanihan at aanihin pa. Sabi ko nga, hindi ako mahihirapan magsimula.”

Pumirma ng kontrata si Tekla sa GMA Artist Center at nahanay sa mga Kapuso artists.

Nakatanggap din ng parangal at iba't ibang pagkilala si Tekla dahil sa kanyang talent.

Mula sa pagbida sa telebisyon, bumida na rin si Tekla sa takilya. Ginampanan niya ang double title role sa pelikulang 'Kiko en Lala.'

Noong June 2020, nabiyayaan si Tekla at ang kanyang live-in partner na si Michelle Bana-ag ng isang anak, si baby Angelo. Isang blessing ang bata ngunit nasubok muli ang komedyante dahil ipinanganak ang sanggol na walang butas sa kanyang puwit.

Hindi na itinuloy ng kanyang live-in partner ang pagsampa ng kaso laban kay Tekla ngunit ang kanilang relasyon ay nauwi na sa hiwalayan. Gayunpaman, nagkasundo pa rin silang parehong gagampanan ang kanilang mga tungkulin at responsibilidad sa kanilang anak na si baby Angelo.

Nakabili na ng kanyang sariling bahay si Tekla. Ipinasilip niya ang kanyang bagong tirahan sa February 4 vlog ng DonEkla in Tandem.

Nitong April 2021, muling humarap sa isyu si Tekla nang marami ang nakapansin sa kanyang biglang pagpayat. Naging bali-balitang bumalik na ito sa bisyo lalo na't napapadalas ang kanyang pagbisita sa kanyang dating live-in partner. Paglinaw ng komedyante, nagsimula na siyang mag-diyeta dahil hindi na magandang panoorin sa TV ang kanyang pagbigat. Ipinaliwanang din niyang ang pagpunta niya sa bahay ni Michelle ay para lamang asikasuhin si baby Angelo.

Sa kabila ng mga isyu na kanyang kinaharap sa mga nagdaang taon ay masaya pa ring ipinagdiwang ni Tekla ang kanyang 40th birthday sa isang episode ng The Boobay and Tekla Show.

Masaya ring ibinahagi ni Tekla sa isang social media post na umabot na sa one million ang bilang ng kanyang subscribers sa kanyang YouTube channel.