Christian Bautista, napiling kumanta para sa 50th anniversary ng ASEAN

Bagama't masaya, aminado si Asia's Romantic Balladeer Christian Bautista na kabado rin siya nang piliing kinatawan ng Pilipinas para sa isang event ng 50th anniversary ng ASEAN.

Magtatanghal si Christian sa ASEAN Pop Concert sa Taguig na gaganapin sa Agosto 8, matapos ang ASEAN Landmark Lighting na gaganapin naman sa CCP sa Pasay.

Ayon sa Chika Minute report ng GMA News "24 Oras" nitong Biyernes, makakasamang mag-perform ni Christian sina Aisyah Aziz ng Singapore, Natthika Iamthamai ng Thailand at Ismi Halida ng Indonesia, na mga kasali rin sa ASEAN countries.

Bukod sa kanilang mga pinasikat na kanta, kakantahin din nila ang ASEAN Spirit na theme song ng selebrasyon.

"It feels good na binigyan ako ng chance, opportunity and responsibility to represent the country. I felt pressured as well. I have to do well," pahayag ni Christian. —Jamil Joseph Santos/NB, GMA News